អាជ្ញាធរអូស្ត្រាលីប្រកាសអាសន្នដល់ពលរដ្ឋឱ្យចាកចេញពីលំនៅដ្ឋាន ទៅកាន់កន្លែងមានសុវត្ថិភាពខណៈដែលប្រទេសនេះកំពុងតែទទួលរងជំនន់ទឹកភ្លៀងក្នុងកម្រិតខ្ពស់ បន្តទៀត
![](http://fbrtvhotnews.com/wp-content/uploads/2022/07/62c2b3bd27856-1-780x470.jpeg)
អូស្រ្តាលី៖ មានការប្រកាសអាសន្នឱ្យ មនុស្សរាប់ពាន់នាក់ ធ្វើជម្លៀសខ្លួនចេញពីលំនៅដ្ឋានរបស់ពួកគេ ដោយសារតែទឹកជំនន់នឹងរំកិលមកដល់តំបន់ឆាប់ៗ ស្របពេលដែលភ្លៀងធ្លាក់ខ្លាំង នៅក្នុងរដ្ឋ ញូវ សោត វែល (New South Wales) ប្រទេសអូស្ត្រាលី ចាប់តាំងពីថ្ងៃសៅរ៍ នៅតែបន្តធ្លាក់ឥតឈប់។
ក្រសួងឧតុនិយមរបស់អូស្ត្រាលី (BoM) ព្រមានពីភ្លៀងធ្លាក់ខ្លាំងនៅទូទាំងរដ្ឋ ញូវ សោត វែល (New South Wales) លើសពី ២០០ មីលីម៉ែត្រ ចាប់ពីថ្ងៃសៅរ៍ នឹងអាចបង្កជាជំនន់ទឹកភ្លៀងក្នុងទំហំធំរហូតដល់សប្តាហ៍បន្ទាប់។
កម្រិតទឹកទន្លេ ចចជេស រីវើ (Georges River) ស្ថិតនៅភាគនិរតីក្នុងទីក្រុងស៊ីដនី (Syney) របស់អូស្ត្រាលី ហក់ឡើងខ្លាំង បន្ទាប់ពីមានភ្លៀងធ្លាក់យ៉ាងខ្លាំងពេញមួយយប់ បង្កជាទឹកជំនន់ លិចផ្លូវហាយវេ និងស្ពានមួយចំនួន ខណៈអាជ្ញាធរ កាលពីព្រឹកថ្ងៃចន្ទ ធ្វើការប្រកាសអាសន្នដល់ប្រជាជនរាប់ពាន់នាក់ក្នុងតំបន់ទំនាបភាគនិរតីទីក្រុងស៊ីដនី ឱ្យផ្លាស់ទីលំនៅជាបណ្តោះអាសន្ន។
គួរបញ្ជាក់ថា កាលពីយប់ថ្ងៃសៅរ៍ នាយកដ្ឋានឆ្លើយតបគ្រោះអាសន្នរបស់អូស្ត្រាលី បានទទួលការហៅទូរសព្ទ័សង្គ្រោះបន្ទាន់ជាង ១,០០០ ករណី និងបានបញ្ជូនក្រុមជួយសង្គ្រោះរាប់សិបនាក់ភ្លាមៗទៅកាន់តំបន់រងគ្រោះ។
បន្ថែមលើសពីនេះទៀត ផ្លូវរថភ្លើងតាមបណ្តោយឆ្នេរសមុទ្រភាគខាងត្បូងរដ្ឋ ញូវ សោត វែល (New South Wales) ត្រូវផ្អាកដំណើរការជាបណ្តោះអាសន្ន បន្ទាប់ពីក្រសួងឧតុនិយម ព្យាករណ៍ថានឹងមានភ្លៀងធ្លាក់ និងខ្យល់កន្ត្រាក់ខ្លាំង ក្នុងរដ្ឋ ញូវ សោត វែល (New South Wales) អាចនឹងបន្តរយៈពេលមួយសប្តាហ៍ថែមទៀត៕