មកFBR hot news
ផ្សាយចេញ.នៅថ្ងៃទី ២២ខែវិច្ឆិកា ឆ្នាំ ២០២២
អភិបាលតំបន់ លោក Ridwan Kamil បាននិយាយថា ការរញ្ជួយដីនៅលើកោះជ្វា នៃប្រទេសឥណ្ឌូណេស៊ី បានសម្លាប់មនុស្សរហូតដល់ ១៦២នាក់ និងរាប់រយនាក់ទៀតរងរបួស។
គ្រោះរញ្ជួយដីកម្រិត ៥.៦ រ៉ិចទ័រ បានវាយប្រហារទីក្រុង Cianjur ក្នុងជម្រៅរាក់ ១០គីឡូម៉ែត្រ។ នេះបើយោងតាមទិន្នន័យពីក្រុមស្ទាបស្ទង់ភូមិសាស្ត្រអាមេរិក។
មនុស្សជាច្រើននាក់ត្រូវបានបញ្ជូនទៅព្យាបាលនៅមន្ទីរពេទ្យ ខណៈក្រុមជួយសង្គ្រោះ ធ្វើការពេញមួយយប់ដើម្បីព្យាយាមជួយសង្គ្រោះ មនុស្សដែលគិតថានៅជាប់ ក្រោមអគារបាក់រលំ។
តំបន់ដែលការរញ្ជួយដីបានវាយប្រហារ គឺជាកន្លែងមានមនុស្សរស់នៅច្រើននិងងាយរងគ្រោះដោយការបាក់ដី។
ថ្លែងទៅកាន់ប្រព័ន្ធផ្សព្វផ្សាយក្នុងស្រុក លោក Kamil បានឲ្យដឹងថា ក្រៅពីអ្នកស្លាប់ មនុស្សប្រហែល៣២៦នាក់ទៀតបានរងរបួសនៅក្នុងការរញ្ជួយដីនេះ។ ពួកគេភាគច្រើនត្រូវរបួសបាក់ឆ្អឹង។ ប៉ុន្តែលោកបានព្រមានថា អ្នកស្រុកមួយចំនួននៅតែជាប់ក្នុងតំបន់ដាច់ស្រយាល ហើយចំនួនអ្នកស្លាប់អាចកើនឡើងបន្ថែមទៀត។
អភិបាលខេត្ត West Java បានបន្ថែមថា មនុស្សជាង ១៣០០០នាក់ ត្រូវផ្លាស់ទីលំនៅដោយសារគ្រោះមហន្តរាយនេះ ហើយទីភ្នាក់ងារកាត់បន្ថយគ្រោះមហន្តរាយជាតិបាននិយាយថា ផ្ទះជាង២២០០ខ្នង ត្រូវខូចខាតដោយសារការរញ្ជួយដី។
គួរបញ្ជាក់ថា ការរញ្ជួយដីតែងតែកើតមាននៅក្នុងប្រទេសឥណ្ឌូណេស៊ី ដែលស្ថិតនៅលើតំបន់ “ខ្សែក្រវាត់ភ្នំភ្លើង” ប៉ាស៊ីហ្វិក។ ប្រទេសនេះមានប្រវត្តិនៃការរញ្ជួយដី និងរលកយក្សស៊ូណាមិដ៏បំផ្លិចបំផ្លាញ ដោយមនុស្សជាង២០០០នាក់ បានស្លាប់ក្នុងហេតុការណ៍នៅ Sulawesi កាលពីឆ្នាំ២០១៨។
