ពលរដ្ឋ ស្រីលង្កាប្រមាណ១០ម៉ឺននាក់ឡោមព័ទ្ធលំនៅដ្ឋានប្រធានាធិបតីទាមទារឱ្យចុះចេញពីតំណែងដោយសារតែអសមត្ថភាពក្នុងការដោះស្រាយវិបត្តិសេដ្ឋកិច្ចជាតិ

ស្រីលង្កា៖ នៅថ្ងៃសៅរ៍  ទី៩  ខែកក្កដានេះ  ប្រជាពលរដ្ឋស្រីលង្ការាប់ពាន់នាក់  បានសម្រុកចូលទៅកាន់លំនៅដ្ឋានរបស់លោកប្រធានាធិបតីស្រីលង្កា  ក្នុងរដ្ឋធានីកូឡុំបូ  ប្រមាណជា  ១០ម៉ឺននាក់  កំពុងប្រមូលផ្តុំគ្នានៅខាងក្រៅ ក្នុងគោលបំណងទទូចឱ្យប្រធានាធិបតី Gotabaya Rajapaksa លាលែងចេញពីតំណែង  ក្រោយពីអសមត្ថភាពក្នុងការដោះស្រាយវិបត្តិសេដ្ឋកិច្ចរបស់ប្រទេសជាតិមិនអាចដំណើរការបានល្អប្រសើរនោះ។

យោងតាមការឱ្យដឹងពីមន្ទីរពេទ្យជាតិក្នុងប្រទេសស្រីលង្កា (NHSL) បញ្ជាក់ថា យ៉ាងហោចណាស់ មនុស្ស៣១នាក់  រួមនឹងមន្ត្រីនគរបាល  ២រូប  រងរបួស  អំឡុងព្រឹត្តិការណ៍តវ៉ាកើតឡើង ដោយពួកគេទាំងអស់គ្នា  កំពុងទទួលការព្យាបាលនៅឯមន្ទីរពេទ្យ។  មន្ត្រីសមត្ថកិច្ច  បញ្ជាក់បន្ថែមទៀតថា ជនរងគ្រោះរបួសស្នាមក្នុងអំឡុងព្រឹត្តិការណ៍ប៉ះទង្គិចគ្នាជាមួយនឹងកងនគរបាល ត្រូវគេរកឃើញថាមាន  ២នាក់  កំពុងស្ថិតក្នុងស្ថានភាពរបួសធ្ងន់ធ្ងរ។

ក្នុងហេតុការណ៍នេះ  លោកប្រធានាធិបតី  មិននៅកន្លែងនោះទេ  ដោយបានគេចខ្លួនទៅកន្លែងផ្សេងរួចទៅហើយ។

មានការបញ្ជាក់មួយទៀត  ពីថ្នាក់ក្រោមរបស់លោក  ថាលោកបានបើកកិច្ចប្រជុំមួយជាបន្ទាន់  ជាមួយអ្នកពាក់ពន្ធ័ក្នុងជួរគណបក្ស  ដើម្បីពិភាក្សា  និងរកដំណោះស្រាយអំពីស្ថានភាពបច្ចប្បន្ននេះ។

ប្រភព៖ CNN