ខេត្តកំពង់ស្ពឺ៖ យុវជន និងព្រះសង្ឃសរុបចំនួន៧អង្គ/នាក់ ត្រូវសមត្ថកិច្ចឃាត់ខ្លួន ក្រោយធ្វើសកម្មភាពផឹកស៊ីចាក់ធុងបាស់ផ្អើលពេញព្រៃ នៅចំណុចព្រៃពនរ ឃុំភ្នំតូច ស្រុកសាមគ្គីមុនីជ័យ កាលពីយប់រំលងអធ្រាត្រឈានចូលថ្ងៃទី១៦វិច្ឆិកា…។
ប្រតិបត្តិការនេះធ្វើឡើង បន្ទាប់ពីអាជ្ញាធរសមត្ថកិច្ចទទួលបានព័ត៌មានពីប្រជាពលរដ្ឋថាមានករណីក្រុមក្មេងទំនើងនាំគ្នាផឹកស៊ី ចាក់ធុងបាស់កងរំពងផ្អើលអស់អារុក្ខអារក្សអ្នកតា ភ្លាមៗលោកឧត្ដមសេនីយ៍ទោ ឃឹម សុកខៃ ស្នងការនៃស្នងការដ្ឋាននគរបាលខេត្តកំពង់ស្ពឺ បានបញ្ជាកម្លាំងអធិការនគរបាលស្រុកសាមគ្គីមុនីជ័យ បានដឹកនាំកម្លាំងចុះឡោមព័ទ្ធចាប់ខ្លួន ព្រះសង្ឃ និងគ្រហស្ថបក្ខពួកបរិវាប្រមាណ៧នាក់ ក្នុងនោះរួមមាន៖ ទី១-ព្រះសង្ឃ ប៉ាង គឹមឈៀង, ទី២-ព្រះសង្ឃ សយ សុភក្រ្ភា, ទី៣-ព្រះសង្ឃ ម៉ុន វិច្ឆ័យ, ខណៈសង្ឃទាំង៣អង្គខាងលើរស់នៅភូមិត្រពាំងកំបោរ ឃុំភ្នំតូច ស្រុកសាមគ្គីមុនីជ័យ បច្ចុប្បន្ន បន្ដការសិក្សាភ្នំពេញ ចំណែកក្រុមបក្ខពួករបស់អតីតសង្ឃរួមមាន៖ ១.ឈ្មោះហុង សៀវជា, ២.ឈ្មោះខុន ខុម, ៣.ឈ្មោះ ហ៊ូ កញ្ញា, ៤.ឈ្មោះ មាស ប៊ុនណា។ ដោយឡែក ចំពោះវត្ថុតាងដកហូតបានមានម៉ូតូ២គ្រឿង និងឧបករណ៍បម្រើឱ្យការផឹកស៊ីមួយចំនួនធំទៀត។
ទោះបីជាយ៉ាងណា ក្រោយចប់ប្រតិបត្តិការ សមត្ថកិច្ចបាននាំខ្លួនក្រុមក្មេងទំនើង និងព្រះសង្ឃដែលប្រព្រឹត្ដខុសវិន័យព្រះពុទ្ធសាសនានាំបរិវាផឹកស្រាក្នុងព្រៃ ត្រូវសមត្ថកិច្ចចុះបង្រ្កាបបញ្ជូនទៅការិយាល័យធម្មការស្រុកចាត់ការតាមធម៌វិន័យ។ បន្ថែមលើនេះ ស្នងការដ្ឋាននគរបាលខេត្ដកំពង់ស្ពឺ ក៏បានសំណូមពរដល់បងប្អូនកូនក្មួយ ពិសេសពុទ្ធបរិស័ទ លោកតា លោកយាយ មាមីង មេត្តាកុំលើកយកបញ្ហានេះមកទម្លាក់រួមលើព្រះពុទ្ធសាសនា នេះជាទង្វើពួកទមិឡមួយក្ដាប់តូចប៉ុណ្ណោះ ដែលកំពុងតែបំផ្លាញសាសនា៕
